├ Honest to Homeless ┤

我沒有申請無線電視收費台，但被志雲飯局這個節目吸引著，當然，我對陳志雲完全沒有興趣，被訪的藝人真情流露才是賣點。

沒有辦法之下，惟有在網上的討論區BT下來看算數。

看了最近訪問掌門人曾志偉的一集，提及一段曾經和阿倫不和的故事，說得很感人。

陳：係你云云朋友之中，最好係邊一個？

曾：一路咁多年裡面，阿倫呀，阿叻呀，或者成龍呀。

陳：你唔係同阿叻唔o岩架咩？

曾：其實，好多人都會覺得，我同阿叻唔o岩，朋友同敵人呢，分得好開，無中間既。咁，然後呢佢就，佢個人好好打不平既，乜野都擺上口講。咁係銀幕上呢，我地好多時都做一個好大拗撬既角色，比如講世界杯如是呀，做主持如是呀，如果唔係無人撐呀，世界杯今日場波，比如英國對千里達，梗係英國贏架啦，咁都要有人要千里達架，如果個個要晒英國咁，咁千里達有乜野好呢？咁人地都打入世界杯丫，咁咪拗囉！咁拗拗下，就梗有個負方架啦，實會拗到面紅面綠，但係呢D係檯面既野，下面大家始終係好朋友。因為畢竟識左咁多年，因為我覺得呢，做朋友已經難，一個相識十幾廿年既師生朋友，係好難得。如果一個相識咁多年既朋友，因為一D好小既野而令大家咩事既話呢，係好唔值得既。呢件事發生過係我同阿倫身上。

咁係咩呢？我記得果次就係，我地有個共同既朋友，有間鋪頭開張，叫阿倫剪綵，咁我就打俾阿倫，阿倫就話，好呀無問題丫，到時我地幫佢囉。好啦，到果日要剪綵啦，佢朝頭早就打電話黎，喂，原來阿邊個叫剪綵間野，係桑拿黎架？好似唔係幾好喎，唱片公司「炸型」喎。咁我就話，人地出晒報紙啦喎，你認承晒人喎，咁我唔知係桑拿呀嘛，你又唔講。咁我就覺得，阿倫你有無攪錯呀，算啦算啦，咁唔夠兄弟。之但係阿妹又去喎，咁我就覺得，人地阿妹又去，阿倫你真係唔o岩。阿倫又覺得幫人要幫得合理先得架，影響我飯碗我就唔幫得，你咁都怪我，咁你又唔o岩丫。咁果陣時我地近乎日日都通電話架啦，咁就無通電話四日。

陳：呢d叫冷戰。

曾：係勒，呢件事我先至明白到，原來冷戰呢樣野呢，就係當大家都覺得大家o岩果陣時呢，就出現左問題。如果有一方覺得自己唔o岩既呢，通常都會借道兒攘返對方傾計既。但係當大家都覺得大家o岩既時候呢，就有問題。咁我當然就係諗，我就考慮到之前我所講既野，係呢個世界，咁多十億人，點會我同你做朋友，你點會做o左我上司，好難得勒，咁仲唔係喎，一做就做十幾年上司，十幾年朋友，更難得啦。喂，係唔係呢件事大家唔傾計先？唔值得丫。

既然係咁，咁都要有返個人摟返對方傾計架，咁邊個摟邊個？咪大人都要有大量丫，咁邊個做大人先？哈哈，我果陣時自己就係度笑勒，果朝早睇下報紙咁，一諗到呢樣野就自己笑o左出竹黎，跟住我就打電話勒。

陳：係個廁所度諗到既？

曾：係呀，一打電話，大家無提過無發生過，跟住隔左段時間，先至再講返。咁阿倫，又講得好o岩既，飯碗就最緊要丫，要唔影響飯碗，點幫朋友都無所謂丫，但，朋友要互相體諒，你無理由唔體諒我呢樣野丫。咁我諗諗下又係喎，我自己又一時衝動，我唔係歌星呀嘛，唔知道歌星形象呢樣，咁你知我不嬲都無乜形象架啦，大排檔又食，周圍食，咁我唔係好察覺呢樣。